गगनगडावर दत्त जयंती सोहळ्याची जय्यत तयारी अंतिम टप्प्यात! ​ प. पू. गगनगिरी महाराजांच्या तपोभूमीत ४ दिवसांचे धार्मिक व सांस्कृतिक कार्यक्रमांचे आयोजन

प्रतिष्ठा न्यूज/ तुकाराम पडवळ ​
गगनबावडा : ​गगनबावडा येथील गगनगडावर परमपूज्य गगनगिरी महाराज यांच्या तपोभूमीत दरवर्षीप्रमाणे यंदाही दत्त जयंती सोहळ्याची तयारी अंतिम टप्प्यात आली आहे. लाखो भाविकांचे श्रद्धास्थान असलेल्या या गडावर ३ डिसेंबर ते ६ डिसेंबर अखेर चार दिवस विविध धार्मिक आणि सांस्कृतिक कार्यक्रमांचे आयोजन करण्यात आले आहे. दत्त जयंती उत्सव समितीच्या वतीने हा सोहळा मोठ्या उत्साहात साजरा होणार आहे.

​ मुख्य सोहळा आणि कार्यक्रमांची रूपरेषा
​दत्त जयंतीचा मुख्य जन्मोत्सव सोहळा ५ डिसेंबर रोजी साजरा होणार आहे. या चार दिवसांत होणारे प्रमुख कार्यक्रम खालीलप्रमाणे आहेत:
​३ डिसेंबर: लघुरुद्र आरंभ
​४ डिसेंबर: महाअभिषेक, पालखी प्रस्थान, दत्तजन्म सोहळा
​५ डिसेंबर: महाअभिषेक व महाआरती
​६ डिसेंबर: होम-हवन
​या सोहळ्यासाठी वाल्मिकी पाटण पायी दिंडी, श्री दत्त जयंती उत्सव समिती पनवेल, रत्नागिरी भक्त मंडळ, संगमनेर दिंडी यांसारख्या विविध दिंड्या गडाकडे मार्गस्थ झाल्या आहेत, तर श्रमिक सेवा मंडळ मुंबई यांची दिंडी आधीच दाखल झाली आहे.

​ गगनगडावर चोख व्यवस्था
​सोहळ्यासाठी गडावरील मंदिरांना रंगरंगोटी करण्यात आली असून, गगनगड आकर्षक विद्युत रोषणाईने उजळून निघणार आहे. श्री क्षेत्र किल्ले गगनगड ट्रस्टच्या वतीने बुधवारी दत्त जयंतीचा मुख्य सोहळा गगनगड पठारावर होणार आहे.
​भाविकांच्या सोयीसाठी प्रशासनाने चोख नियोजनाच्या सूचना दिल्या आहेत:
​तहसील कार्यालयात प्रांताधिकारी यांच्या उपस्थितीत बैठकीत वाहतूक नियोजन आणि गगनबावडा आगारातून जादा गाड्यांचे नियोजन करण्याच्या सूचना देण्यात आल्या आहेत. (या बैठकीबाबत पत्रकारांना कल्पना न दिल्यामुळे चर्चा आहे.)
​गगनबावडा ग्रामपंचायतीने स्वच्छता, स्ट्रीट लाईट आणि पाणी यांसारख्या आवश्यक सुविधा उपलब्ध करून दिल्या आहेत.
​पोलिसांनी बंदोबस्त, आरोग्य, वीज वितरण आणि रस्ते सेवांच्या समन्वयाने भाविकांना कोणताही त्रास होणार नाही याची दक्षता घेण्याचे निर्देश दिले आहेत.
​लक्षवेधी श्रद्धास्थान आणि विश्व गौरव सन्मान विभूषित, महान योगी, परमपूज्य गगनगिरी महाराजांची तपोभूमी म्हणून ओळखल्या जाणाऱ्या गगनगडावर या अपूर्व सोहळ्यासाठी भाविकांची मांदियाळी जमली आहे.

“सर्व संबंधित खात्यांच्या अधिकाऱ्यांना बोलाविण्यात आले. मात्र या महत्त्वाच्या बैठकीसाठी पत्रकारांना अजिबात आमंत्रण देण्यात आले नाही, ही बाब विशेष लक्षवेधी ठरली आहे.”