जुनी पेन्शन योजना लागू करावी या मागणीसाठी सांगलीत विराट मोर्चा काढणार : पृथ्वीराज पाटील

सांगली प्रतिनिधी :  नवीन पेन्शन योजना कुचकामी आहे. त्यामुळे अनेक कर्मचाऱ्यांचे संसार अडचणीत आले आहेत. राजस्थान, छत्तीसगड, पंजाब, हिमाचल प्रदेश व झारखंड शासनानी नवी पेन्शन योजना काढून जुनी पेन्शन योजना लागू केली आहे. ते महाराष्ट्र शासन का करु शकत नाही? पक्ष, व्यक्ती व विचार बाजूला ठेवून एक होऊन रस्त्यावर उतरून आंदोलन करु या. यासाठी आपलाच एक सहकारी म्हणून संपूर्ण सहकार्य करु व यासाठी विविध संघटनांच्या मागणीप्रमाणे त्यांच्या सहकार्याने हजारोंच्या संख्येने सांगलीच्या कलेक्टर कार्यालयावर मोर्चा काढला जाईल. मोर्चाचा प्रारंभ सांगली मिरज रोडवरील कर्मवीर भाऊराव पाटील पुतळा चौकातून रविवार दि.१२ मार्च २०२३ रोजी स. १० वा. होऊन सांगली येथील जुन्या कलेक्टर ऑफिस मध्ये निवेदन देऊन मान्यवरांच्या भाषणानंतर मोर्चाचा समारोप होणार आहे असे प्रतिपादन सांगली जिल्हा शहर काँग्रेसचे अध्यक्ष पृथ्वीराज पाटील बाबा यांनी केले. जुन्या पेन्शन योजनेचे गांभीर्य शासनाच्या लक्षात आणून देण्यासाठी लढ्याची आगामी दिशा निश्चित करण्यासाठी आज मिरजेत गुलाबराव पाटील शैक्षणिक संकुलातील केंब्रिज इंटरनॅशनल स्कूल मध्ये आयोजित विविध संघटनांचे पदाधिकारी व प्रतिनिधींच्या बैठकीत निमंत्रक म्हणून ते बोलत होते.ते पुढे म्हणाले, ‘सांगली मोर्चाचा आवाज व ताकद विधीमंडळाच्या अधिवेशनात पोहचला पाहिजे यासाठी विविध शासकीय, निमशासकीय, शिक्षक व शिक्षकेतर कर्मचारी आपल्या कुटुंबियासह मोर्चात हजारोंच्या संख्येने सहभागी व्हावे. मोर्चा आयोजनासाठी एक समन्वय समिती गठीत करुन शिस्तबद्ध पद्धतीने मोर्चा काढण्यात येणार आहे. ‘