निरोगी राहण्यासाठी नियमितपणे योग करा : पालकमंत्री डॉ. सुरेश खाडे; बिरनाळे आर्किटेक्चर कॉलेज येथे आंतरराष्ट्रीय योग दिवस उत्साहात साजरा
प्रतिष्ठा न्यूज
सांगली, दि. 21 : निरोगी राहण्यासाठी सर्वांनी नियमितपणे योग करण्याची गरज आहे. प्रत्येकाने किमान अर्धा तास दररोज योग करावा आणि आपले आरोग्य निरोगी ठेवावे, असे आवाहन पालकमंत्री डॉ. सुरेश खाडे यांनी आज आंतरराष्ट्रीय योगदिन कार्यक्रम प्रसंगी केले.
जिल्हा प्रशासन, क्रीडा विभाग व बिरनाळे आर्किटेक्चर कॉलेज व आयुर्वेदिक महाविद्यालय यांच्या संयुक्त विद्यमाने आंतरराष्ट्रीय योग दिवस बिरनाळे आर्किटेक्चर कॉलेज व आयुर्वेदिक महाविद्यालय येथे उत्साहात साजरा करण्यात आला. यावेळी पालकमंत्री डॉ. सुरेश खाडे, आमदार सुधीर गाडगीळ, जिल्हाधिकारी डॉ. राजा दयानिधी, कोल्हापूर विभागाचे क्रीडा उपसंचालक माणिक पाटील, जिल्हा क्रीडा अधिकारी किरण बोरवडेकर, बिरनाळे कॉलेजचे संस्थापक सागर बिरनाळे, महाविद्यालयाच्या प्राचार्या श्रीमती वाटेगावे यांच्यासह विविध विभागांचे अधिकारी व मान्यवर नागरिकांनी सहभाग घेतला. आंतरराष्ट्रीय योग दिन कार्यक्रमात विविध आसने, प्राणायम, ध्यान इत्यादी योग क्रिया घेण्यात आल्या.
