रविवारी तासगावच्या श्रींचा 245 वा रथोत्सव…गणपती पंचायतनकडून जोरदार तयारी
प्रतिष्ठा न्यूज/किरण कुंभार
तासगाव : भाद्रपद शुक्ल प्रतिपदा 4 सप्टेंबर पासून तासगावच्या श्री गणपति पंचायतन देवस्थानच्या 245 व्या गणेशोत्सवास प्रारंभ झाला आहे. सरसेनापती परशुरामभाऊ पटवर्धन यांनी चालू केलेल्या या उत्सवाचे विशेष म्हणजे येथील गणपति मंदिरातील श्री गणेशमूर्ती ही उजव्या सोंडेची असून हा गणपति नवसाला पावणारा म्हणून प्रसिद्ध आहे.4 सप्टेंबरला दुपारी १२ वाजता ‘श्रीं’ची षोडशोपचार महापूजा आणि आरतीचें पौरोहित्य दीपक पां.जोशी व अनंत शं जोशी यांच्या हस्ते संपन्न झाले.दुपारी ४.३० ते सायंकाळी ६ पर्यंत ह.भ.प.गजाननबुवा वाठारकर यांचे नारदीय कीर्तन,तसेच सायंकाळी ६ ते रात्री ७ या वेळेत ‘श्रीं’चा छबिना झाला.यावेळी भजन,पोवाडे आणि गायन असा कार्यक्रम झाला.
त्यानंतर 5 तारखेला रात्री ७.३० ते ८.३० श्री.राजेंद्र पटवर्धन यांचे शास्त्रीय सतारवादन होणार आहे.7 सप्टेंबर म्हणजे गणेशचतुर्थीच्या दिवशी सकाळी 10 वाजता ‘श्रीं’च्या मूर्तीचे श्रीमंत पटवर्धन राजवाड्यात आगमन,सकाळी 10.30 ते दुपारी 12 वाजेपर्यंत ‘श्रीं’ची १ सहस्र दुर्वायुक्त महापूजा होईल.याचे पौरोहित्य पंडित अनंतशास्त्री जोशी करतील.रात्री ८ ते ९ या वेळेत श्री गणपति मंदिर येथे श्रींचा पं. अनंतशास्त्री,पं.दीपकशास्त्री, पं.अभिषेकशास्त्री,पं.श्रीपाद शास्त्री,पं.अथर्व शास्त्री,पं.सौरभशास्त्री हे मंत्रजागर सादर करणार आहेत.
*रविवार 8 सप्टेंबरला ‘श्रीं’चा 245 वा रथोत्सव*
रविवार 8 सप्टेंबर ऋषींपंचमी दिवशी दुपारी 1 ते सायंकाळी 5 पर्यंत 245 वा रथोत्सव होईल,याचे नेतृत्व गौरी गजलक्ष्मी करणार असून या रथोत्सवास श्री गणपति मंदिर येथून प्रारंभ होईल.तो काशीविश्वेश्वर मंदिर येथे जाऊन परत श्री गणपति मंदिर येथे येईल.सोमवारी सकाळी ९ वाजता पंडित गजाननबुवा वाठारकर यांच्या लळीत कीर्तनाने उत्सवाची सांगता होईल.तरी भाविकांनी या कार्यक्रमांचा लाभ घ्यावा,असे आवाहन श्री.गणपती पंचायतन देवस्थानचें विश्वस्थ श्री राजेंद्र पटवर्धन,श्री राहुल पटवर्धन,श्री पवन सिंह कुडमल,श्री अथर्व जोशी यांनी केले आहे.